អំពើពុករលួយរបស់មន្ត្រីរដ្ឋបាលជលផលខេត្តស្ទឹងត្រែង ត្រូវបានលាតត្រដាង
22-July-2016 | ដោយ មែន កំសត់
ប្រជាពលរដ្ឋនៅខេត្តស្ទឹងត្រែង បានអំពាវនាវឲ្យលោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់និងនេសាទ ចាត់វិធានការទៅលើអំពើពុករលួយនិងភាពអសកម្មរបស់មន្ត្រីរដ្ឋបាលជលផល ក្នុងខេត្តស្ទឹងត្រែងជាបន្ទាន់ ព្រោះដោយសារតែអំពើពុករលួយនោះហើយទើបបទល្មើសនេសាទរាលដាលកាន់តែខ្លាំង ឡើងៗ។ ជាក់ស្ដែងសំបុត្រអនាមិកមួយត្រូវបានជនមិនស្គាល់មុខសរសេរ ហើយយកទៅបោះជូនក្នុងហាងលក់បាយ លក់កាហ្វេមួយកន្លែងនៅភូមិព្រែក សង្កាត់ស្ទឹងត្រែង ក្រុងស្ទឹងត្រែង ហើយនៅក្នុងលិខិតអនាមិកនោះបានលាតត្រដាងច្បាស់ៗពីឈ្មោះ មន្ត្រីរដ្ឋបាលជលផលពុករលួយ៣នាក់ ព្រមទាំងបក្ខពួកមួយចំនួនផងដែរ។ ហេតុនេះលោក អេង ជាសាន ដែលជាអគ្គនាយករដ្ឋបាលជលផល មិនត្រូវបណ្ដែតបណ្ដោយតទៅទៀតទេ ក្នុងខណៈដែលបទល្មើសនេសាទក្នុងខេត្តស្ទឹងត្រែង រាលដាលកាន់តែខ្លាំងនៅក្នុងរដូវបិទនេសាទ។
នៅក្នុងលិខិតអនាមិកដែលគេបានឃើញ កាលពីព្រឹកថ្ងៃទី២១ ខែកក្កដា ឆ្នាំ២០១៦ បានសរសេរច្បាស់ៗពីឈ្មោះមន្ត្រីជលផលចំនួន៣នាក់ដែលប្រព្រឹត្ត អំពើពុករលួយ ដើរប្រមូលលុយពីក្រុមជនល្មើសដែលធ្វើសកម្មភាពនេសាទខុសច្បាប់។ ក្នុងនោះទី១-ឈ្មោះ អេង លី ទី២-ឈ្មោះ សាវ៉េត និងទី៣-ឈ្មោះ រ៉េត ហើយមន្ត្រីជលផលទាំង៣នាក់នេះ ដើរប្រមូលលុយពីក្រុមអ្នកនេសាទខុសច្បាប់ក្នុងភូមិចំនួន៤ផ្សេងគ្នា គឺភូមិកោះខ្លី ភូមិកោះស្នែង ភូមិខាំផាន់ និងភូមិអូរស្វាយ។ លខិតអនាមិកបានលាតត្រដាងទៀតថា ទូកនេសាទខុសច្បាប់ត្រូវបង់ឲ្យមន្ត្រីទាំង៣នាក់ខាងលើក្នុង១ គ្រឿង៥០ម៉ឺនរៀល ហើយបច្ចុប្បន្នមានទូករាប់សិបគ្រឿងកំពុងធ្វើសកម្មភាពនេសាទ ខុសច្បាប់។
ទាក់ទងនឹងបញ្ហាខាងលើនេះដែរ ប្រជាពលរដ្ឋនិងមន្ត្រីអាជ្ញាធរមូលដ្ឋានក្នុងខេត្តស្ទឹងត្រែង បានឲ្យដឹងថាប្រសិនបើគ្មានការបើកដៃពីលោក ទុំ នីរ៉ូ ប្រធានស្ដីទីខណ្ឌរដ្ឋបាលជលផលខេត្តស្ទឹងត្រែងទេនោះ គឺមន្ត្រីជលផលឈ្មោះ អេង លី ឈ្មោះ សាវ៉េត និងឈ្មោះ រ៉េត មិនហ៊ានធ្វើអ្វីៗស្រេចតែអំពើចិត្តឡើយ។ ដូច្នេះរដ្ឋមន្ត្រីក្រសួងកសិកម្ម ក៏ដូចជាអគ្គនាយករដ្ឋបាលជលផល ត្រូវពិនិត្យឡើងវិញនូវអំពើពុករលួយនិងភាពអសកម្មរបស់មន្ត្រីរដ្ឋបាល ជលផលក្នុងខេត្តស្ទឹងត្រែង ព្រោះបច្ចុប្បន្នតំបន់អភិរក្សពូជត្រីកំពុងតែប្រឈមនឹងការបំផ្លាញ យ៉ាងពេញបន្ទុកតែម្តង។ ប្រជាពលរដ្ឋបានលើកឡើងថា ដោយសារអំពើពុករលួយរបស់មន្ត្រីរដ្ឋបាលជលផល ទើបក្រុមជនល្មើសអាចធ្វើសកម្មភាពនេសាទខុសច្បាប់ក្នុងរដូវបិទនេសាទ ដោយគ្មានញញើតអ្វីទាំងអស់ ដូច្នេះក្រសួងនិងស្ថាប័នពាក់ព័ន្ធ ត្រូវចាត់វិធានការទប់ស្កាត់បទល្មើសឲ្យស្របតាមបទបញ្ជាលេខ០០១ ប្រកបដោយប្រសិទ្ធភាព៕
ចំនួនអ្នកទស្សនា
- ថ្ងៃនេះ4191
- ម្សិលមិញ4891
- សប្តាហ៍នេះ20101
- ខែនេះ24941
- ឆ្នាំនេះ809571
- សរុប21252027